Act 28 | BOJ | STEP | Iga kalil alile dia pateleŋonamqa nui di aqa ñam Malta degsi mergonab quem.

Acts 28

Pol a Malta nuiq di soqnej

1 Iga kalil alile dia pateleŋonamqa nui di aqa ñam Malta degsi mergonab quem. 2 Onaqa tamo uŋgasari nui dia soqneb qaji naŋgi kumbra tulaŋ boledamu ysibqa iga geregereigeb. Osib awa boqnej deqa iga yorgonaqa ŋam tuŋguyosib mergeb, “Niŋgi bosib ŋamyuo areq endi awooiye.” Onaqa iga ŋamyuo areq di awoonam jejamu kaŋkaŋgej. 3 Onaqa Pol a ŋam koroiyosiqa osi gilsiqa ŋamyuoq di atnaqa amal uge ŋam miligiq di soqnej qaji kaŋkaŋyonaqa oqedosiqa Pol aqa baŋq di uñiyosiqa gaiŋesoqnej. 4 Onaqa nui deqaji tamo uŋgasari naŋgi amal uge Pol aqa baŋq di uñiyosiq gaiŋesonaqa unsibqa segi segi maroqneb, “Tamo endi a tamo qalo qaji kio? A yuwalq di moiosai deqa gago qotei na amal uge qariŋyqoqa a uñiyqo. Deqa a moiqas.” 5 Onaqa Pol na aqa baŋ butuyonaqa amal uloŋosiqa ŋamyuoq aiej. Onaqa Pol a bole soqnej. Aqa jejamu yala gulube bei osai. 6 Onaqa naŋgi Pol koqyoqneb. Aqa jejamu suŋyqas kio a moisim uloŋoqujatqas kio degsi marsibqa tariŋkobaiyeb. Tariŋonab tariŋonab Pol aqa jejamuq di gulube bei brantosai. Deqa naŋgi areqalo bei osib mareb, “Tamo endi a qotei bei.”

7 Ariya tamo bei aqa ñam Publius a nui dia soqnej. A tamo kobaquja. A na nui di taqatoqnej. Aqa tal jojomq di soqnej deqa a na iga joqsiqa aqa talq gilsiqa dia bati qalub iga geregereigoqnej. 8 Iga Publius aqa talq di sonamqa aqa siqali makobaiyonaqa ŋeiesoqnej. Aqa jejamu tulaŋ kaŋkaŋyosiqa bi mormantej. Deqa Pol na aqa areq gilsiqa Qotei pailyosiq aqa jejamuq di baŋ atnaqa aqa ma koboosiq olo boleej. 9 A degyonaqa nui deqaji tamo uŋgasari mainjrej qaji naŋgi qusibqa Pol aqa areq beqnabqa a na naŋgi kalil boletnjroqnej. 10 Ariya nui deqaji tamo uŋgasari kalil naŋgi iga geregereigoqnsib kumbra tulaŋ boledamu egoqneb. Onaqa bunuqna iga nui di uratqa laqnamqa iŋgi iŋgi kalil iga saigeleŋej qaji di naŋgi na olo egeleŋonab gago iŋgi iŋgi kereej.

Pol a olo qobuŋ bei osiq Rom qureq di brantej

11 Iga nui dia bai qalub soqnem. Di koboonaqa iga qobuŋ bei gogetosim aiem. Qobuŋ di jagwa bati qa nui dia beterosiq soqnej. Qobuŋ di Aleksandria qure qaji. Qobuŋ aqa namoq dia qotei bei aqa ñam Sus aqa aŋgro aiyel naŋgo sulum gereiyosib atnab soqnej. 12 Iga Malta nui uratosim qobuŋ na aisim Sirakyus qureq di tiryosimqa bati qalub di soqnem. 13 Dena qobuŋ na aisim Regium qureq di tiryosim ŋeiem. Nebeonaqa jagwa guta na bonaqa iga qobuŋ na aieqnam qoloej. Olo nebeonaq iga aisim Puteoli qureq di tiryem. 14 Dia iga Kristen tamo qudei naŋgi itnjrem. Itnjrnamqa naŋgi na mergonabqa iga bati 7-pela naŋgi koba na soqnem. Sosimqa naŋgi olo uratnjrsimqa siŋga na walwelosim Rom qureq di brantqa marsim aiem. 15 Rom dia Kristen tamo qudei naŋgi iga aieqnam di qusibqa gamq dia iga itgwajqa marsib walwelosi beb. Naŋgi beqnabqa iga aioqnsim gam qalaq di koro sawa bei aqa ñam Apius dia naŋgi qudei turem. Olo aisimqa sawa bei aqa ñam Ŋereŋo Tal Qalub dia naŋgi qudei turem. Turosim unjrsimqa Pol a tulaŋ areboleboleiyonaqa Qotei biŋiyosiqa aqa are siŋgilakobaiyej.

16 Ariya iga naŋgi ti koba na aisim Rom qureq di brantem. Onaqa Rom naŋgo mandor koba Sisar a na aqa qaja tamo qudei naŋgi qariŋnjrnaqa bosib Pol osib aqa segi talq di atnab soqnej. Pol a ulaŋaim deqa qaja tamo qujai minjnab a na taqatesoqnej.

Pol a Rom qureq dia Yesus aqa anjam bole tamo uŋgasari naŋgi minjroqnej

17 Pol a di sosiqa bati qalub koboonaqa a na Juda tamo kokba Rom dia soqneb qaji naŋgi metnjrnaqa bosib aqa areq di koroonab minjrej, “O ijo was niŋgi quiye. Jerusalem dia Juda tamo kokba naŋgi e laŋa ojsib tonto talq waibeb. Naŋgi ijo une bei unosai. E Juda gago kumbra bei ugeugeiyosaioqnem. Gago moma naŋgo dal anjam dego gotraŋyosaioqnem. Juda tamo kokba naŋgi e laŋa ojsib Rom naŋgo baŋq di ateb. 18 Deqa e Rom gate kokba naŋgo ulatamuq di tigelosim ijo anjam mareqnamqa naŋgi qusibqa une kobaquja bei ijo jejamuq di unosai. Deqa naŋgi mareb, ‘Pol a une saiqoji. Deqa iga na a qalsim moiotqa keresai. Deqa uŋgum. Iga na tonto talq dena uratim oqedqas.’ Naŋgi degsib mareb. 19 Onaqa Juda naŋgi anjam di gotraŋyeb. Deqa e gam bei saiqoji. E marem, ‘E Sisar aqa ulatamuq di tigelotqa a ijo anjam quqwas.’ E degsi marem. Ariya e Juda naŋgo jejamuq di une bei qamqajqa are sosai. 20 Utru deqa e niŋgi metŋgonum. E niŋgi niŋgsiy ijo anjam merŋgwajqa deqa metŋgonum. Mondoŋ Qotei na iga Israel tamo uŋgasari iga subq na tigeltgwas. Iga anjam deqa qujai gago areqalo siŋgilatosim tariŋeqnum. Utru deqa e sil kokba endena tontbonub.” Pol a na degsiqa Juda tamo kokba naŋgi minjrej.

21 Onaqa naŋgi na Pol minjeb, “Judia sawa qaji tamo qudei naŋgi anjam bei ni qa neŋgreŋyosib gagoq qariŋyosai. Juda tamo bei na bosiq ni qa anjam uge bei mergosai. 22 Deqa ni segi na ino anjam mergim iga quqwom. Iga qalieonum, sawa sawa kalilq dia tamo uŋgasari naŋgi Yesus aqa anjam bunuj di misiliŋyeqnub.” Juda tamo kokba naŋgi na Pol degsib minjeb.

23 Osib olo koroqajqa bati ateb. Onaqa koro bati brantonaqa Juda tamo kokba tulaŋ gargekoba naŋgi nobqolo bosib Pol aqa talq di koroeb. Koroonabqa Pol a naŋgo ambleq di tigelosiqa anjam utru atsiq anjam gargekoba naŋgi minjreqnaq gilsiq bilaqtej. Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru plaltosiqa minjroqnej. Moses aqa dal anjam dena ti Qotei aqa medabu o tamo naŋgo anjam nami neŋgreŋyeb qaji dena ti anjam mutu quja quja eleŋoqnsiqa naŋgo are qametnjrimqa naŋgi are bulyosib Yesus qa naŋgo areqalo siŋgilatqajqa deqa siŋgila na minjroqnej. 24 Minjreqnaqa Juda tamo kokba qudei naŋgi Pol aqa anjam qusib mareb, “Anjam di bole.” Onaqa naŋgi qudei Pol aqa anjam qusib quosaibulosib mareb, “Anjam di bolesai.” 25 Naŋgi degsib areqalo aiyeltosib tigelosib jaraiqa laqnabqa Pol na anjam qujai endegsi minjrej, “Mondor Bole a nami Qotei aqa medabu o qaji tamo Aisaia aqa medabuq na gago moma naŋgi anjam minjrej. A anjam bole endegsi minjrej, 26 ‘O Aisaia, ni Israel tamo naŋgoq giloqnsimqa endegsim minjroqne, “Niŋgi bati gargekoba ijo anjam quoqnsib anjam aqa utru niŋgi poiŋgoqnqasai. Niŋgi bati gargekoba nuŋgo ŋamdamu na ijo kumbra unoqnsib kumbra aqa utru dego niŋgi poiŋgoqnqasai.” 27 O Aisaia, Juda tamo naŋgo areqalo geteŋnjrejunu deqa naŋgo dabkala na ijo anjam quqwa tulaŋ asginjroqnqas. Naŋgi ŋam bruŋesqab. Deqa naŋgo ŋamdamu na ijo kumbra unoqnqa keresai. Naŋgo dabkala na ijo anjam dego quoqnqa keresai. Deqa naŋgi ijo anjam aqa utru poinjrqa keresai. Naŋgi are bulyosib ijoq bqa keresai. Deqa e na naŋgi boletnjrqasai.’ Qotei a nami Aisaia degsi minjej.”

28 Osiqa Pol a olo anjam endegsi minjrej, “Deqa ijo was niŋgi endegsi poiŋgem. Juda tamo uŋgasari naŋgi na Qotei aqa anjam quqwa urateqnub deqa Qotei na sawa bei bei qaji tamo naŋgi oqa marsiqa anjam qariŋyqo naŋgoq gilqo. Naŋgi Qotei aqa anjam uratqasai. Naŋgi qusib dauryqab.” 29 Pol a na Juda tamo kokba naŋgi anjam degsi minjrnaqa naŋgi qusibqa segi segi ŋiriŋkobaosib tigelosib jaraieb.

30 Onaqa Pol aqa segi tal awaiyoqnej qaji dia wausau aiyel sonaqa tamo uŋgasari gargekoba naŋgi a unqajqa beqnabqa a na naŋgi joqoqnsiqa aqa talq dia koba na awooqnsib qairoqneb. 31 Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru Pol na plaltoqnsiqa naŋgi sainjroqnej. Tamo Koba Yesus Kristus qa dego anjam plaltosiq sainjroqnej. Pol a anjam deqaji marqajqa ulaosaioqnej. A anjam deqaji mareqnaqa tamo bei na saidyosaioqnej.